2020 წლის საპრეზიდენტო არჩევნების შედეგების გაუქმების მცდელობის საქმეზე დონალდ ტრამპის სასამართლო პროცესი 2024 წლის მარტში დაიწყება.

მოსამართლე ტანია ჩუტკანმა, რომელიც პროცესს უხელმძღვანელებს, ორშაბათს განაცხადა, რომ სასამართლო პროცესი ვაშინგტონში 2024 წლის 4 მარტს დაიწყება.

აღსანიშნავია, რომ სპეციალური პროკურორი, ჯეკ სმიტი სასამართლო პროცესის 2024 წლის 2 იანვარს დაწყებას ითხოვდა.

2 აგვისტოს, ნაფიცმა მსაჯულებმა მხარი დაუჭირეს დონალდ ტრამპისთვის ბრალის წაყენებას 2020 წლის საპრეზიდენტო არჩევნების შედეგების გაუქმების მცდელობის საქმეზე.

იუსტიციის დეპარტამენტმა ტრამპს ბრალი წაუყენა შემდეგი ოთხი მუხლით:

• შეთქმულება შეერთებული შტატების მოტყუების მიზნით არაკეთილსინდისიერების, თაღლითობისა და მოტყუების გამოყენების გზით, რათა ხელი შეშლოდა ქვეყნის საპრეზიდენტო არჩევნების შედეგების შეგროვების, დათვლისა და დამოწმების პროცესს;
• შეთქმულება 6 იანვრის კონგრესის სხდომის შეფერხების მიზნით, სადაც საპრეზიდენტო არჩევნების შეგროვებული შედეგების დათვლა და დამოწმება ხდება;
• შეთქმულება ხმის მიცემის უფლებისა და ხმის დათვლის წინააღმდეგ;
• საარჩევნო ხმის დამოწმებისთვის ხელის შეშლა და ხელის შეშლის მცდელობა.

"ბრალდებულმა და შეთქმულების თანამონაწილეებმა ცრუ განცხადებები არჩევნების გაყალბების შესახებ შეგნებულად გამოიყენეს, რათა შტატის კანონმდებლები და საარჩევნო ოფიციალური პირები იძულებულნი გაეხადათ, ლეგიტიმური არჩევნების შედეგები გაეუქმებინათ და ბრალდებულის ოპონენტის, ჯოზეფ ბაიდენის საარჩევნო ხმები ბრალდებულის ხმებით შეეცვალათ", - ნათქვამია საბრალდებო დასკვნაში