ირანის სულიერი ლიდერის აიათოლა ალი ხამენეის განცხადებით, სირიაში ირანის საკონსულოზე თავდასხმის გამო ისრაელი უნდა დაისაჯოს და დაისჯება კიდეც. ამასთან, ირანის საგარეო საქმეთა მინისტრმა, ჰოსეინ ამირაბდოლაჰიანმა ისრაელისთვის ე.წ. მწვანე შუქის ანთების გამო აშშ-ი დაადანაშაულა.

აიათოლა ალი ხამენეის განცხადებას გამოეხმაურა ისრაელის საგარეო საქმეთა მინისტრი. ისრაელ კაცის თქმით, თუ ირანი ისრაელს თავს დაესხმება, ამას საპასუხო რეაგირება მოჰყვება.

„ირანი თავისი ტერიტორიიდან თუ დაგვესხმება თავს, ისრაელი უპასუხებს და დაარტყამს მას“, – წერს ისრაელ კაცი სოციალურ ქსელში.

შეგახსენებთ, პირველ აპრილს საჰაერო თავდასხმის შედეგად მთლიანად განადგურდა დამასკოში მდებარე ირანის საკონსულოს შენობა. შედეგად დაიღუპა შვიდი ირანელი მაღალჩინოსანი და სირიის ექვსი მოქალაქე.