აინშტაინის ზოგადი ფარდობითობის საკვანძო პრინციპმა ამ დრომდე ყველაზე მკაცრი ტესტი წარმატებით გაიარა
15 სექტემბერი, 2022
აინშტაინის ფარდობითობის ზოგადმა თეორიამ ახლახან ამ დრომდე ყველაზე მკაცრი ტესტი ჩააბარა.
სპეციალურად შექმნილი თანამგზავრის გამოყენებით, მეცნიერთა საერთაშორისო ჯგუფმა დედამიწის ორბიტაზე თავისუფალ ვარდნაში მყოფი ორი ობიექტის აჩქარება გაზომა. ხუთი თვის მონაცემებზე დაყრდნობით მიღებული შედეგები მიუთითებს, რომ აჩქარებები ერთმანეთისგან 1015-ის ერთზე მეტი ნაწილით არ განსხვავდება, რაც სუსტი ეკვივალენტობის პრინციპის ნებისმიერ დარღვევას გამორიცხავს ასეთ მასშტაბზე.
სუსტი ეკვივალენტობის პრინციპი შედარებით მარტივად დასაკვირვებელია და ბრძანებს, რომ ყველა ობიექტი, მიუხედავად მათი მასისა და შემადგენლობისა, იდენტურად ჩქარდება ერთნაირ გრავიტაციულ ველში, როდესაც მათზე სხვა რაიმე არ ზემოქმედებს.
ამ დრამატული ეფექტის ალბათ ყველაზე ცნობილი დემონსტრირება 1971 წელს მოხდა, როდესაც მთვარის ზედაპირზე მდგარმა ასტრონავტმა დეივ სკოტმა ერთნაირი სიმაღლიდან, ერთდროულად ჩამოაგდო ჩაქუჩი და ბუმბული. რადგან ჰაერის წინაღობა ბუმბულს არ ანელებდა, ორივე ობიექტი მთვარის ზედაპირზე ერთნაირი სიჩქარით ჩავარდა.
ახალი ექსპერიმენტი, სახელად MICROSCOPE, რომელსაც ახლახან გარდაცვლილი ფიზიკოსი პიერ ტუბული ხელმძღვანელობდა, გაცილებით უფრო მკაცრი იყო, ვიდრე სკოტის მიერ მთვარეზე ჩატარებული დემონსტრირება. მასში ჩართული იყო ხელოვნური თანამგზავრი, რომელიც დედამიწის გარშემო 2016 წლის 25 აპრილიდან დეაქტივაციამდე, 2018 წლის 18 ოქტომბრამდე მოძრაობდა.
