ალექსანდრე დუგინი მიიჩნევს, რომ მკვლელების სამიზნე სწორედ მისი ქალიშვილი, დარია იყო
28 აგვისტო, 2022
ფილოსოფოსი, საერთაშორისო ევრაზიული მოძრაობის ლიდერი ალექსანდრე დუგინი მიიჩნევს, რომ მკვლელების სამიზნე სწორედ მისი ქალიშვილი, დარია იყო. დუგინის ვარაუდით, ის „რუსული იდეის“ გამო დაიღუპა.
წამყვანის კითხვას: "რატომ მოკლეს დარია დუგინა" – მან [რუსეთის ტელევიზიის] პირველ არხზე ნაჩვენები ფილმის ფრაგმენტში უპასუხა.
„ყველაფერი იქითკენ იყო მიმართული, რომ დარია მოეკლათ და ეს გამოუვიდათ. სწორედ ის იყო სამიზნე,“ - განაცხადა ფილოსოფოსმა.
პოლიტოლოგი და ჟურნალისტი დარია დუგინა 20 აგვისტოს, მოსკოვის ოლქის ოდინცოვოს რაიონში, მოჟაისკის გზატკეცილზე მანქანის აფეთქების შედეგად დაიღუპა. ორი დღის შემდეგ „ფსბ“-მ გამოაცხადა, რომ საქმე გახსნილია. მათი განცხადებით, მკვლელობის უკან უკრაინის სპეცსამსახურები დგანან, ხოლო შემსრულებელი - უკრაინის მოქალაქე ნატალია ვოვკია, რომელიც ქალიშვილთან ერთად რუსეთში 23 ივლისს ჩავიდა და შემდგომ ფსკოვის ოლქის გავლით ესტონეთში გაემგზავრა.
რუსეთის ტელევიზიის პირველ არხზე 28 აგვისტოს საღამოს დაგეგმილია დოკუმენტური პროექტის „დახუჭო თვალები, დარჩე მეომრად...“ ჩვენება, რომელიც დარია დუგინას ცხოვრებას და გარდაცვალებას ეძღვნება.
