2022 წლის 4 ოქტომბერს, საგარეო საქმეთა მინისტრის მოადგილემ ალექსანდრე ხვთისიაშვილმა, შეხვედრა გამართა გერმანიის აღმოსავლეთ ბიზნეს ასოციაციის (German Eastern Business Association) წარმომადგენლებთან, რომლის შემადგენლობაში იყვნენ 18 მსხვილი გერმანული კომპანიის წარმომადგენლები, მათ შორის ლოგისტიკის, საინფორმაციო ტექნოლოგიების, ფარმაცევტიკის და სოფლის მეურნეობის მიმართულებით.

მინისტრის მოადგილე მიესალმა ქვეყნებს შორის სავაჭრო-ეკონომიკური ურთიერთობების გაღრმავებას და გამოთქვა მზადყოფნა ინვესტიციების მოზიდვის მიმართულებით თანამშრომლობისთვის. ყურადღება გამახვილდა ევროპული და ევროატლანტიკური ინტეგრაციის მიმართულებით საქართველოს მთავრობის მიერ გაწეულ ძალისხმევაზე.

ალექსანდრე ხვთისიაშვილმა დელეგაციის წარმომადგენლებს მიაწოდა ინფორმაცია საქართველოში არსებული ხელსაყრელი საინვესტიციო გარემოსა და ბიზნეს შესაძლებლობების შესახებ. ხაზი გაესვა თავისუფალი ვაჭრობის შეთანხმებებს საქართველოსა და ევროკავშირს, ჩინეთსა და რეგიონის ქვეყნებს შორის, რაც ინვესტორებისთვის ქმნის ხელსაყრელ პირობებს მსოფლიო წამყვან ბაზარზე თავისუფალი წვდომისთვის.

აღინიშნა, რომ რეგიონში არსებული გამოწვევების მიუხედავად, მიმდინარე წელს საქართველოს უპრეცედენტოდ მაღალი, ორნიშნა ეკონომიკური ზრდა აქვს, რაც ქვეყნის გონივრული და სწორი პოლიტიკის შედეგია.

ხაზი გაესვა ლოგისტიკის, ტრანსპორტის, სოფლის მეურნეობისა და ტურიზმის მიმართულებით საქართველოს პოტენციალს და ამ სფეროში უცხოელი ინვესტორების მზარდ ინტერესს.

დასასრულს მხარეებმა გამოთქვეს მზაობა მომავალი თანამშრომლობისთვის.