თურქეთის სახელმწიფო სააგენტო „ანადოლუ“ საქართველოს პრემიერ-მინისტრის, ირაკლი ღარიბაშვილისა და თურქეთის პრეზიდენტის, რეჯეფ თაიფ ერდოღანის შეხვედრის შესახებ ინფორმაციას ავრცელებს.

როგორ ინფორმაციაშია აღნიშნული, მხარეებმა შუა დერეფნის მნიშვნელობაზე ისაუბრეს.

„თურქეთის პრეზიდენტმა ბაქო-თბილისი-ყარსის რკინიგზის სწრაფად ამოქმედების პრიორიტეტულობას ხაზი გაუსვა”, – წერს თურქული მედია.

თურქეთის საგარეო საქმეთა სამინისტროს ცნობით, ტრანსკასპიური აღმოსავლეთ-დასავლეთის დერეფნის ინიციატივა, რომელიც „შუა დერეფნის“ სახელწოდებით არის ცნობილი, თურქეთს, საქართველოს, აზერბაიჯანს მოიცავს და კასპიის ზღვის გავლით ცენტრალურ აზიასა და ჩინეთს უკავშირდება.

უწყების ცნობით, „შუა დერეფანი“ უძველესი აბრეშუმის გზის აღდგენისკენ მიმართულ ძალისხმევაში ერთ-ერთი უმნიშვნელოვანესი კომპონენტია.

ამასთან, როგორც „ანადოლუ“ წერს, ირაკლი ღარიბაშვილთან შეხვედრაზე რეჯეფ თაიფ ერდოღანმა საქართველოს თებერვალში დამანგრეველი მიწისძვრისას გაწეული დახმარებისთვის მადლობა გადაუხადა.

„ერდოღანმა ასევე ხაზი გაუსვა საქართველოში ფეტჰულა გიულენის ორგანიზაციის მიერ მართული სკოლების დახურვის და მათი ანგარიშების გაყინვის მნიშვნელობას და აღნიშნა საქართველოს მთავრობის მიერ ამ მიმართულებით გადადგმული ნაბიჯები”, – ნათქვამია თურქეთის პრეზიდენტის ადმინისტრაციის განცხადებაში, რომელსაც „ანადოლუ“ ავრცელებს.

თურქული მედიის ცნობით, ლიდერებმა ასევე ისაუბრეს თურქეთსა და საქართველოს შორის ვაჭრობის მოცულობის სამი მილიარდი დოლარიდან ხუთ მილიარდ დოლარამდე გაზრდის მნიშვნელობაზე.