ნატო-ს ყოფილი გენერალური მდივანი, ანდერს ფოგ რასმუსენი ინიციატივით გამოვიდა, უკრაინა სამხედრო-პოლიტიკურ ალიანსში რუსეთის მიერ ოკუპირებული ტერიტორიების გარეშე მიიღონ. ამის შესახებ The Guardian-ი წერს.

რასმუსენმა უარყო, რომ ეს ნაბიჯი კონფლიქტის გაყინვას და უკრაინის ტერიტორიის რუსეთისთვის დათმობას გამოიწვევს. მისი თქმით, ეს ნაბიჯი რუსეთისთვის გაფრთხილება იქნება, რომ ის უკრაინის დასავლურ თავდაცვით ალიანსში გაწევრიანებას ხელს ვერ შეუშლის.

მისივე განმარტებით, ნატო-ში მთელი უკრაინის გაწევრიანება, რუსეთისთვის იმის მაჩვენებელი იქნებოდა, რომ ნატო მოსკოვთან ომს აპირებს. ხოლო, ალიანსში უკრაინის რუსეთის მიერ ოკუპირებული ტერიტორიების გარეშე მიღება ნატო-რუსეთის კონფლიქტს შეამცირებს.

„დადგა დრო, შემდეგი ნაბიჯი გადავდგათ და უკრაინა ნატო-ში გასაწევრიანებლად მოვიწვიოთ. ჩვენ გვჭირდება ახალი ევროპული უსაფრთხოების არქიტექტურა, რომელშიც უკრაინა ნატო-ს შუაგულში იქნება. მეხუთე მუხლით გათვალისწინებული გარანტიები რუსეთს არ მისცემს იმის შესაძლებლობას, იერიში ნატო-ს შემადგენლობაში მყოფ უკრაინულ ტერიტორიაზე მიიტანოს, რაც, თავის მხრივ, უკრაინულ ჯარებს ფრონტის ხაზზე ხელფეხს გაუხსნის“, - აცხადებს რასმუსენი.