დედაქალაქის მთავარი ნაძვის ხე და ქუჩებში საახალწლო ილუმინაციები 15 დეკემბერს აინთება, - ამის შესახებ თბილისის მერის მოადგილემ, ანდრია ბასილაიამ განაცხადა.

CNN-ის მიერ მიერ თბილისის შესახებ გამოქვეყნებულ მასალაზე საუბრისას ბასილაიამ აღნიშნა, რომ ძალიან აქტიურად მუშაობენ, რათა თბილისი საახალწლოდ ყველასთვის ძალიან საინტერესო იყოს.

„ბოლო წლებში ჩვენ ძალიან აქტიურად ვმუშაობთ იმისთვის, რომ საახალწლო დღეები დედაქალაქში ყველასთვის ძალიან საინტერესო იყოს. წელს 15 დეკემბერს ავანთებთ დედაქალაქის მთავარ ნაძვის ხეს და ქუჩებში - ყველა საახალწლო ილუმინაციას. 16 დეკემბრიდან კი ტრადიციულად, საშობაო სოფელი უმასპინძლებს ყველა ვიზიტორს. იქ იქნება საშობაო ბაზრობა, ბავშვთა აქტივობები, კონცერტები. ასევე, წელს გვაქვს რამდენიმე სიახლე. კერძოდ, გვექნება ღია ყინულის მოედანი, რომელიც ერთი თვის განმავლობაში უსასყიდლოდ უმასპინძლებს ყველა ვიზიტორს. დედაენის ბაღში კი გვექნება ძალიან დიდი სივრცე, ტრადიციულად სანტას სახლთან ერთად და ყველა იმ აქტივობით, რასაც ჩვენი პატარები ელოდებიან“, - განაცხადა ბასილაიამ.

მისივე თქმით, საშობაო სოფელი 7 იანვრამდე მოეწყობა და იქ თავის ნაწარმს 500-ზე მეტი მეწარმე წარმოადგენს.

CNN-მა იმ ევროპული ქალაქების სია შეადგინა, სადაც მოგზაურობა საშობაოდ განსაკუთრებით ჯადოსნურია. ჩამონათვალში ერთ-ერთი თბილისია.