პოლონეთის პრეზიდენტმა ანდჯეი დუდამ ხუთშაბათს განაცხადა, რომ ის მზადაა უკრაინის პრეზიდენტ ვოლოდიმირ ზელენსკის ესაუბროს, როგორც "მეგობარს", რათა მათ ქვეყნებს შორის "რთული სიტუაციები გადაჭრას". მარცვლეულის იმპორტის დავის ფონზე, ვარშავამ ასევე მიანიშნა, რომ კიევში იარაღის გაგზავნას შეწყვეტს.

ჟურნალისტის შეკითხვაზე, გაანაწყენა თუ არა ზელენსკის კომენტარებმა, რომელიც მან გაერო-ს გენერალურ ასამბლეაზე გამოსვლისას გააკეთა, დუდამ განაცხადა „ნაწყენი, ალბათ, ძალიან ძლიერი სიტყვაა“.

„გამწარებული ვიყავი, მირჩევნია ასე ვთქვა. მაგრამ, მოდით, მშვიდად ვიყოთ, გთხოვთ, ტემპერატურას ნუ გავზრდით, რადგან ეს არის დავა, რომელიც ეხება ჩვენი ურთიერთობების მცირე ნაწილს. ნუ დავუშვებთ, რომ ამან ყველაფერზე მთლიანობაში მოახდიანოს გავლენა, რადგან ამას არანაირი გამართლება არ ექნება და მხოლოდ სხვები ისარგებლებენ“, – განაცხადა დუდამ.

რაც შეეხება უკრაინისთვის იარაღის მიწოდებაზე პოლონეთის პრემიერ-მინისტრის, მატეუშ მორავიეცკის განცხადებას, რომ ვარშავა იარაღს აღარ გადასცემდა კიევს, დუდამ აღნიშნა, რომ აღნიშნული განცხადება „ყველაზე უარესი სახით იქნა ინტერპრეტირებული“.

მისი განმარტებით, მორავიეცკი საუბრობდა პოლონეთის არმიის მოდერნიზაციისთვის განკუთვნილ ახალ იარაღზე, რომ პოლონეთის არსებული დაპირებები უკრაინას, მათ შორის „ჰაუბიცების“, საბრძოლო მასალისა და ნაღმების გამწმენდი მანქანების შესახებ, შესრულდება. ამასთან ერთად, მან არ გამორიცხა მომავალში კიევში იარაღის გადაცემის განახლების შესაძლებლობა.