22 სექტემბერი, 2022

გაეროს უშიშროების საბჭოს სხდომაზე სიტყვით გამოსვლისას, გაეროს გენერალურმა მდივანმა, ანტონიო გუტერეშმა განაცხადა, რომ ბირთვული კონფლიქტის შესახებ საუბარი აბსოლუტურად მიუღებელია.

ანტონიო გუტერეში ასევე გამოეხმაურა უკრაინის ოკუპირებულ ტერიტორიებზე რუსეთის მიერ დაგეგმილ ე.წ. რეფერენდუმებს და ხაზგასმით აღნიშნა, რომ „სხვა სახელმწიფოს ტერიტორიის ნებისმიერი ანექსია ძალის გამოყენების ან მისი გამოყენების მუქარის გზით გაეროს წესდებისა და საერთაშორისო სამართლის დარღვევაა“.

ამასთან, გუტერეშმა დასძინა, რომ ზაპოროჟიეს ატომურ ელექტროსადგურზე არსებული ვითარება კვლავ სერიოზულ შეშფოთებას იწვევს.

გაეროს გენერალური მდივანი რუსეთსა და უკრაინას შორის გაცვლის შედეგად პატიმრების გათავისუფლებას მიესალმა.