ქერჩის სრუტეზე გამავალ სარკინიგზო ხიდზე აფეთქება მოხდა, რომლის შედეგად საავტომობილო ხიდის ნაწილი ჩამოინგრა, ხოლო, საწვავის რამდენიმე ავზს ხანძარი გაუჩნდა. ხიდზე მანქანებისა და მატარებლების მოძრაობა შეჩერებულია.

რუსეთის ეროვნული ანტიტერორისტული კომიტეტის განცხადებით, ყირიმის ხიდზე სატვირთო მანქანის აფეთქება მოხდა, რამაც მატარებლის საწვავით სავსე შვიდი ცისტერნის აალება გამოიწვია.

"დღეს დილით, ექვს საათსა და შვიდ წუთზე, ყირიმის ხიდის საავტომობილო ნაწილზე, ტამანის ნახევარკუნძულის მხრიდან სატვირთო ავტომანქანა ააფეთქეს, რამაც მატარებლის შემადგენლობის შვიდი, საწვავით სავსე ავზის აფეთქება გამოიწვია", - ნათქვამია განცხადებაში.

ყირიმის ხიდი, რომლის აშენების ბრძანებაც პუტინმა ნახევარკუნძულის ანექსიის შემდეგ გასცა, 2018 წლის მაისში გაიხსნა. გახსნის ცერემონიას, რომელიც სახელმწიფო ტელევიზიით გადაიცემოდა, რუსეთის პრეზიდენტი პირადად დაესწრო.