საქართველოს პარლამენტი საარჩევნო რეფორმას განიხილავს, ცვლილების მიხედვით, ქვეყანაში მომდევნო არჩევნები ელექტრონულად უნდა ჩატარდეს.

აღნიშნულ რეფორმასთან დაკავშირებით დღეს პარლამენტში პირველი მოსმენა გაიმართა. ცვლილებები კანონმდებლებს უმრავლესობის წევრმა გივი მიქანაძემ გააცნო. მისი თქმით, მომდევნო არჩევნებზე ამომრჩევლის სულ მცირე 70 პროცენტი ხმას ახალი წესით მისცემს.

„2024 წლამდე არის საკმარისი დრო და ჩვენ ვნახავთ რა შესაძლებლობები არსებობს იმისთვის, რომ ეს მაჩვენებელი გაიზარდოს. ამასთან, დარჩენილ 30% ამომრჩეველთან მიმართებაში ჩვენ ასევე შემოგვაქვს ინოვაცია“, - განაცხადა გივი მიქანაძემ.

უმრავლესობის წევრმა განმარტა, რომ ყველა იმ უბანში, სადაც არჩევნები ტრადიციული მეთოდით ჩატარდება, მოხდება ბიულეტენების გაციფრულება მაღალტექნოლოგიური სკანერისა თუ ფოტოაპარატის მეშვეობით.

საკანონმდებლო ორგანოში ამ წუთებში დეპუტატები კითხვა-პასუხის რეჟიმში არიან გადასულები. ოპოზიციონერი დეპუტატების შეკითხვები ძირითადად, საარჩევნო კამპანიის დაფინანსების ნაწილსა და საარჩევნო პროცესში ემიგრანტების ჩართულობას ეხება.