აშშ-ის წარმომადგენელთა პალატამ ნიუ იორკის შტატის წარმომადგენელი, რესპუბლიკელი ჯორჯ სანტოსი კონგრესიდან გარიცხა. კენჭისყრას 311-მა კონგრესმენმა 114-ის წინააღმდეგ დაუჭირა მხარი. ნიუ იორკელი სანტოსი მეექვსე ადამიანია კონგრესის ისტორიაში, რომელიც წარმომადგენელთა პალატიდან გარიცხეს. ეს იშვიათი მოვლენა ხმათა ორ-მესამედს საჭიროებს და სასჯელის ყველაზე მკაცრ ფორმას წარმოადგენს.

სანტოსს მიმდინარე წლის მაისში ელექტრონულ თაღლითობაში, ფულის გათეთრებასა და საჯარო სახსრების მითვისებაში წაუყენეს ბრალი. მას ასევე წარმომადგენელთა პალატაში არსებითად ცრუ განცხადებების გაკეთებაში ადანაშაულებენ. ის მის წინააღმდეგ წარდგენილ 23-ვე ბრალში თავს უდანაშაულოდ ცნობს.

34 წლის ჯორჯ სანტოსი კონგრესში 2022 წლის ნოემბრის შუალედური არჩევნების შედეგად აირჩიეს. კონგრესმენის მანდატის მიღების შემდეგ ამერიკულ მედიაში მალევე გავრცელდა ცნობები, რომ სანტოსმა ბიოგრაფიის ნაწილი გააყალბა. კერძოდ, მას განათლებისა და სამუშაო გამოცდილების შესახებ ტყუილს, ასევე კამპანიის დაფინანსების წესების დარღვევას ედავებიან. პროკურატურის ცნობით, საარჩევნო კამპანიის დაფინანსებისთვის მიღებულ თანხებს ის პირადი მიზნებისთვის, მათ შორის ძვირადღირებულ ტანსაცმელზე ხარჯავდა. მას ასევე ცხოველთა დამცველი ყალბი საქველმოქმედო ორგანიზაციის შექმნასა და მისი თანხების მითვისებაში ადანაშაულებენ.

თავად სანტოსმა აღიარა, რომ თავისი რეზიუმე „შეალამაზა“, თუმცა სერიოზულ დანაშაულს, მათ შორის თანხების მითვისებას უარყოფს.