ამერიკის შეერთებული შტატების ყოფილი სახელმწიფო მდივანი, დიპლომატი და საერთაშორისო ურთიერთობების ექსპერტი ჰენრი კისინჯერი საკუთარ სახლში, 100 წლის ასაკში გარდაიცვალა. ინფორმაციას ამერიკული მედია ავრცელებს.

სხვადასხვა წლებში კისინჯერს შეერთებული შტატების სახელმწიფო მდივნისა და ეროვნული უსაფრთხოების მრჩევლის თანამდებობები ეკავა. ვიეტნამში ცეცხლის შეწყვეტის შესახებ მოლაპარაკებების წარმოებისათვის, მან მშვიდობის განმტკიცების დარგში ნობელის პრემია მიიღო, თუმცა, კისინჯერის დაჯილდოება საკამათო გახდა და კომიტეტის ორი წევრი პროტესტის ნიშნად გადადგა.

ჰენრი კისინჯერი ამერიკულ პოლიტიკაში დღემდე საკამათო და პოლარიზებულ ფიგურად რჩება: ერთი მხრივ, ბევრი ჟურნალისტი, პოლიტიკური აქტივისტი თუ უფლებადამცველი იურისტი მას ომის დამნაშავედაც კი მიიჩნევს, მეორე მხრივ კი, საერთაშორისო ურთიერთობების მრავალი ცნობილი მეცნიერი კისინჯერს ძალიან ეფექტურ სახელმწიფო მდივნად და მოღვაწედ ასახელებს.