ამერიკის შეერთებულმა შტატებმა თავის მოქალაქეებს მოუწოდა, „დაუყოვნებლივ“ დატოვონ ბელარუსი. განცხადება ამის შესახებ ბელარუსში აშშ-ს საელჩოს გვერდზე გავრცელდა.

აშშ საკუთარ მოქალაქეებს ასევე მოუწოდებს, თავი შეიკავონ ბელარუსში, რუსეთსა და უკრაინაში გამგზავრებისგან, რადგან საგანგებო სიტუაციის შემთხვევაში აშშ-ის დიპლომატიური წარმომადგენლობა მოქალაქეებს სათანადო დახმარებას სრულად ვერ გაუწევს.

რეგიონში მზარდი დაძაბულობის ფონზე ლიეტუვამ ბელარუსთან ექვსი საკონტროლო გამშვები პუნქტიდან ორი უკვე დახურა, ხოლო პოლონეთის, ლიეტუვას და ლატვიის მთავრობებმა განაცხადეს, რომ საჭიროების შემთხვევაში, ბელარუსთან საზღვრის ჩაკეტვის პროცესი შესაძლოა გაგრძელდეს.

ბალტიისპირეთის ქვეყნებისა და პოლონეთის მინისტრთა კაბინეტის წევრები ამ საკითხზე მსჯელობას 28 აგვისტოს ვარშავაში გეგმავენ.