20 სექტემბერი, 2022

ATINATI-ს კულტურის ცენტრი ალექსანდრე ბანძელაძის (1927-1992) გამოფენას მასპინძლობს. გამოფენაზე წარდგენილი იქნება მხატვრის უნიკალური ნამუშევრები „ტრიპტიხი“, რომლებიც საქართველოში ევროპიდან ATINATI-ს ხელშეწყობით ახლახან დაბრუნდა.

ფერწერული ტილოების გარდა, ასევე გამოიფინება მხატვრის გრაფიკული ნამუშევრები, რომლებიც ალექსანდრე ბანძელაძის შემოქმედების სხვადასხვა ეტაპს ასახავს.

ალექსანდრე (შურა) ბანძელაძის სახელი ქართული აბსტრაქტული ექსპრესიონიზმის განვითარებასა და 1980იანი წლების ქართველი ნონკომფორმისტების პლეადის ჩამოყალიბებას უკავშირდება. მისი შემოქმედება ეტაპური მნიშვნელობის მოვლენაა ახალი ქართული ხელოვნების განვითარების ისტორიაში.

ალექსანდრე (შურა) ბანძელაძე დაიბადა 1927 წლის 27 თებერვალს, ტულუნიში, რუსეთში, სადაც მისი ოჯახი 1920-იანი წლების რეპრესიების დროს გადაასახლეს და საქართველოში მხოლოდ 1932 წელს დაბრუნდა. სწავლობდა თბილისის სახელმწიფო სამხატვრო აკადემიაში, სერგო ქობულაძის ხელმძღვანელობით. 1978–1988 წლებში მან შექმნა ფრესკები ღვთისმშობლის მიძინების ეკლესიაში დიდუბის რაიონში. ალექსანდრე ბანძელაძე ერთ-ერთი პირველი მხატვარია, რომელმაც შემოიტანა აბსტრაქტული ექსპრესიონიზმი საქართველოში და გავლენა მოახდინა ქართველ ხელოვანთა შემდეგ თაობაზე.

გამოფენა 22 სექტემბერს, 18:00 საათზე გაიხსნება და 22 ოქტომბრამდე გაგრძელდება.