აზერბაიჯანი და სომხეთი ერთმანეთს ცეცხლის გახსნაში ადანაშაულებენ
28 სექტემბერი, 2022
აზერბაიჯანული და სომხური მხარეები ერთმანეთს ცეცხლის გახსნაში ადანაშაულებენ.
სომხეთის თავდაცვის სამინისტროს პრესსპიკერმა, არამ ტოროსიანმა სოციალურ ქსელში დაწერა, რომ 28 სექტემბერს, 18:00 საათიდან აზერბაიჯანის შეიარაღებული ძალების ნაწილებმა ნაღმტყორცნებიდან და მსხვილი კალიბრის იარაღიდან სომხეთ-აზერბაიჯანის საზღვრის აღმოსავლეთ მონაკვეთზე მდებარე სომხური საბრძოლო პოზიციების მიმართულებით ცეცხლი გახსნეს.
მისი თქმით, სომხურმა მხარემ საპასუხო მოქმედებები განახორციელა.
აზერბაიჯანის თავდაცვის სამინისტრომ კი განაცხადა, რომ სომხეთის შეიარაღებული ძალების მიერ დაბომბვის შედეგად მისი სამხედრო მოსამსახურე დაიჭრა.
„ცეცხლის შეწყვეტის შესახებ მიღწეული შეთანხმების მიუხედავად, 28 სექტემბერს დაახლოებით 18:00 საათზე სომხეთის შეიარაღებული ძალების ქვედანაყოფებმა სხვადასხვა მხრიდან ცეცხლი გაუხსნეს აზერბაიჯანის არმიის პოზიციებს, ქალბაჯარის ოლქის ალაგოლიარის მიმართულებით. დაბომბვის შედეგად დაიჭრა აზერბაიჯანის არმიის სამხედრო მოსამსახურე. მითითებულ მიმართულებით დისლოცირებულმა აზერბაიჯანის არმიის ქვედანაყოფებმა ადეკვატური საპასუხო ზომები მიიღეს. მომხდარზე პასუხისმგებლობა სომხეთის სამხედრო-პოლიტიკურ უწყებას ეკისრება“, - ნათქვამია აზერბაიჯანის თავდაცვის სამინისტროს პრესსამსახურში.