აზერბაიჯანის საგარეო საქმეთა სამინისტრო სომეხი ეროვნების მოქალაქეებს მოუწოდებს, თავიანთი საცხოვრებელი ადგილები ყარაბაღში არ დატოვონ. ამის შესახებ აზერბაიჯანის საგარეო უწყების მიერ გამოქვეყნებულ განცხადებაშია ნათქვამი.

მათივე თქმით, სომხეთის პრემიერ-მინისტრმა ნიკოლ ფაშინიანმა კარგად იცის, რომ ყარაბაღის რეგიონში მცხოვრები სომეხი მაცხოვრებლების წასვლა მათი პირადი გადაწყვეტილებაა და არანაირი კავშირი არ აქვს იძულებით გადასახლებასთან.

"თუ ყარაბაღის სომეხი მოსახლეობის ზოგიერთ ნაწილს არ სურს იქ ცხოვრება და აზერბაიჯანის კანონებისადმი დამორჩილება, ჩვენ მათ ამის გაკეთებას ვერ ვაიძულებთ. ჩვენ სომეხ მოსახლეობას მოვუწოდებთ, საცხოვრებელი ადგილი არ დატოვონ და აზერბაიჯანის მრავალეროვნული საზოგადოების ნაწილი გახდნენ.

რეგიონში მშვიდობისა და უსაფრთხოების დასამყარებლად, სომხეთმა უნდა მოხსნას ბარიერები, რომლებიც აფერხებს სომეხი მაცხოვრებლების რეინტეგრაციის პროცესს და ყურადღება გაამახვილოს სამშვიდობო შეთანხმების შესახებ მოლაპარაკებების პროცესის წარმატებულ დასრულებაზე, რომელიც დაფუძნებულია ორივე ქვეყნის ტერიტორიულ მთლიანობასა და სუვერენიტეტზე“, – ნათქვამია განცხადებაში.