16 სექტემბერი, 2022

პოლიტიკური პარტიების მიმართ უნდობლობა გამოწვეულია იმით, რომ დღეისათვის ოპოზიციურმა პარტიებმა ხელისუფლება ვერ შეცვალეს, - ამის შესახებ „ლელოს“ ერთ-ერთმა ლიდერმა, ბადრი ჯაფარიძემ განაცხადა, რითაც გამოეხმაურა NDI-ის მიერ ჩატარებული კვლევის შედეგებს, რომელშიც როგორც ოპოზიციის, ისე მმართველი პოლიტიკური პარტიის მიმართ საზოგადოების ნდობის მაჩვენებელი შემცირებულია.

„პოლიტიკური პარტიების მიმართ უნდობლობა გამოწვეულია იმით, რომ დღეისათვის ოპოზიციურმა პარტიებმა ვერ შეძლეს იმ ხელისუფლების ცვლილება, რომელიც არ მოსწონს ჩვენი მოსახლეობის დიდ უმრავლესობას. ეს არის უკმაყოფილების მიზეზი და ეს პირდაპირ ჩანს, იმიტომ რომ უმრავლესობა ასევე მიიჩნევს, რომ ქვეყანა ცუდად იმართება“, - აცხადებს ჯაფარიძე.

NDI-მ საზოგადოებრივი აზრის კვლევის შედეგები გამოაქვეყნა. შეკითხვაზე - რომელი პარტია დგას თქვენს შეხედულებებთან ყველაზე ახლოს, 25 პროცენტი „ქართულ ოცნებას“ ასახელებს, 8 პროცენტი „ერთიან ნაციონალურ მოძრაობას“, 13 - პროცენტი სხვა პარტიებს, 54-მა პროცენტმა კი შეკითხვაზე შემდეგი პასუხი დააფიქსირა: არც ერთი პარტია, არ ვიცი და უარი პასუხზე.