აშშ-ის პრეზიდენტის, ჯო ბაიდენის თქმით, მან ისრაელის პრემიერ-მინისტრს, ბენიამინ ნეთანიაჰუს ღაზაში ბრძოლების დროებით შეჩერება სთხოვა. როგორც მანამდე თეთრი სახლის წარმომადგენელმა განაცხადა, აშშ-ისა და ისრაელის ლიდერებმა „ტაქტიკური პაუზის“ შესაძლებლობა განიხილეს, რაც მნიშვნელოვანია ჰუმანიტარული დახმარების მიწოდებისა და მძევლების შესაძლო გათავისუფლების გამო. ბაიდენს რეპორტიორმა ჰკითხა, შესთავაზა თუ არა მან ისრაელის პრემიერ-მინისტრს სამდღიანი პაუზა, თუმცა, აშშ-ის პრეზიდენტმა ე.წ. პაუზის ხანგრძლივობაზე კომენტარი არ გააკეთა.

ისრაელსა და „ჰამასს“ შორის სამხედრო მოქმედებების დროებით შეჩერების მოწოდებით გამოდიან დიდი შვიდეულის ჯგუფის საგარეო საქმეთა მინისტრებიც. მათი თქმით, მნიშვნელოვანია ღაზის სექტორს ჰუმანიტარული მარაგი მიეწოდოს.

„ხაზს ვუსვამთ ისრაელის უფლებას, საერთაშორისო სამართლის შესაბამისად, დაიცვას საკუთარი თავი და ხალხი. ისრაელი ცდილობს 7 ოქტომბრის თავდასხმის გამეორება აიცილოს თავიდან. ასევე მხარს ვუჭერთ ჰუმანიტარულ პაუზებს, რაც ხელს შეუწყობს სასწრაფო დახმარების მიწოდებას, სამოქალაქო პირების გადაადგილებას და მძევლების გათავისუფლებას“, - აცხადებენ აშშ-ის, ბრიტანეთის, კანადის, საფრანგეთის, გერმანიის, იაპონიისა და იტალიის საგარეო საქმეთა მინისტრები. განცხადებაში მინისტრები ასევე მოუწოდებენ ირანს, თავი შეიკავოს „ჰამასის“, „ჰეზბოლას“ და სხვა აქტორების მხარდაჭერისგან და საკუთარი გავლენა შექმნილი სიტუაციის დეესკალაციისთვის გამოიყენოს.