4 სექტემბერი, 2022

აზერბაიჯანი მხარს დაუჭერს ტრანსკასპიური გაზსადენის პროექტს, თუ თურქმენეთის ხელისუფლება გადაწყვეტს მის მშენებლობას, მაგრამ ბაქო არ იქნება პროექტის ინიციატორი - ამის შესახებ აზერბაიჯანის პრეზიდენტმა ილჰამ ალიევმა განაცხადა.

"რაც შეეხება ტრანსკასპიური გაზსადენის მშენებლობის პროექტს, ის დიდი ხნის განმავლობაში განიხილება, ფაქტობრივად, 15 წელია, მაგრამ პროექტის განსახორციელებლად პრაქტიკული ნაბიჯები არ გადადგმულა“, - განაცხადა ალიევმა იტალიურ გაზეთი Il Sole 24 Ore-სთან საუბრისას.

მისი თქმით, ტრანსკასპიური გაზსადენი არ არის აზერბაიჯანის პროექტი. „ეს პროექტი ეფუძნება თურქმენეთის რესურსებს. ამიტომ, თუ თურქმენეთის მთავრობა გადაწყვეტს ამ გაზსადენის აშენებას, ეს მათი გადაწყვეტილება იქნება. თუ ისინი მიიღებენ ასეთ გადაწყვეტილებას, მაშინ, რა თქმა უნდა, ჩვენ მათ მხარს დავუჭერთ. მაგრამ ჩვენ აქ ინიციატორები არ ვიქნებით“, - განაცხადა ალიევმა.

მან დასძინა, რომ აზერბაიჯანმა ერთხელ წამოიწყო ნავთობისა და გაზის ძირითადი რეგიონული პროექტების განხორციელება: სამხრეთ გაზის დერეფნის, ბაქო-ჯეიჰანის ნავთობსადენის მშენებლობა. მისი თქმით, ამ პროექტების განსახორციელებლად აზერბაიჯანმა შექმნა გუნდი, აწარმოა მოლაპარაკებები უცხო სახელმწიფოებთან, მომხმარებლებთან, კომპანიებთან. აზერბაიჯანი ასევე მოქმედებდა როგორც მთავარი ინვესტორი“, - განაცხადა პრეზიდენტმა.

„მინდა ვთქვა, რომ ასეთი პროექტების ინიციატორები არიან არა სატრანზიტო ქვეყნები, არამედ რესურსების მფლობელები“, - აღნიშნა ალიევმა, „ტრანზიტულ ქვეყნებს შეუძლიათ მხოლოდ მხარდაჭერა, ტერიტორიის უზრუნველყოფა და სატრანზიტო ტარიფების დადგენასთან დაკავშირებით გადაწყვეტილების მიღება“.

ალიევის თქმით, ამჟამად აზერბაიჯანი და თურქმენეთი კასპიის ზღვაში „დოსტლუგის“ საბადოს ერთობლივი განვითარების საკითხს განიხილავენ, რომელიც, მისივე თქმით, „არ არის გაზის საბადო, ძირითადად ნავთობის საბადოა“.