ისრაელის ომის კაბინეტის წევრი და თავდაცვის ყოფილი მინისტრი ბენი განცი ითხოვს, რომ ისრაელის პრემიერ-მინისტრმა, ბენიამინ ნეთანიაჰუმ 8 ივნისამდე ჩამოაყალიბოს ექვსპუნქტიანი გეგმა, რომელიც შეეხება ღაზის სექტორის საკითხს, მძევლების დაბრუნებისა და არაბულ ქვეყნებთან ურთიერთობის ნორმალიზაციის მცდელობებს. განცის თქმით, წინააღმდეგ შემთხვევაში, თავის პარტიას საგანგებო მთავრობიდან გაიყვანს.

განცმა განაცხადა, რომ ისრაელმა უნდა შეცვალოს კურსი.

„მიუხედავად იმისა, რომ ისრაელელი ჯარისკაცები წარმოუდგენელ სიმამაცეს ავლენენ ფრონტზე, ზოგიერთი ადამიანი, ვინც ისინი საბრძოლველად გაგზავნა, მოქმედებენ სიმხდალით და პასუხისმგებლობის ნაკლებობით. ზოგიერთი პოლიტიკოსი მხოლოდ საკუთარ თავზე ფიქრობს. ომის მოგება შესაძლებელია მხოლოდ მკაფიო და რეალისტური სტრატეგიული კომპასით. საჭიროა ცვლილებები აქ და ახლა“, – განაცხადა განცმა.

ისრაელის ომის კაბინეტის წევრმა პირობა დადო, რომ მისი „ნაციონალური ერთობა“ ყველაფერს გააკეთებს კურსის შესაცვლელად და რეალური გამარჯვებისთვის.