ისრაელის პრემიერ-მინისტრის, ბენიამინ ნეთანიაჰუს განცხადებით, ღაზაში მიმდინარე სახმელეთო ოპერაცია „ჰამასთან“ ომის მეორე ეტაპია, რომელსაც ძალიან მკაფიო მიზნები აქვს.

როგორც ნეთანიაჰუმ ბრიფინგზე განაცხადა, ისრაელის დამატებითი სახმელეთო ძალები ღაზაში შევიდნენ, რათა „ჰამასი“ დაშალონ და მძევლები სახლში დააბრუნონ.

ისრაელის პრემიერ-მინისტრმა დასძინა, რომ მათი ჯარისკაცები და მეთაურები ახლა ღაზის სექტორში იმყოფებიან და „ისინი ყველგან არიან განლაგებული“.

ამასთან, ნეთანიაჰუ გამოეხმაურა საერთაშორისო საზოგადოების მხრიდან გაკეთებულ განცხადებებსაც.

„ნუ დაგვადანაშაულებთ ომის დანაშაულებში. თუ ფიქრობთ, რომ შეგიძლიათ ჩვენი ჯარისკაცების დადანაშაულება ომის დანაშაულებში, ეს ფარისევლობაა. ჩვენ ვართ ყველაზე მორალური არმია მსოფლიოში“, – ამბობს ნეთანიაჰუ.

მისი თქმით, ისრაელის თავდაცვის ძალები მშვიდობიანი მოსახლეობის დასაცავად სიფრთხილის ზომებს იყენებენ. ამასთან, ნეთანიაჰუმ „ჰამასი“ „თავიანთი ხალხის ფარად გამოყენებით“ კაცობრიობის წინააღმდეგ დანაშაულის ჩადენაში დაადანაშაულა.

„ეს იქნება ხანგრძლივი და რთული ომი. ჩვენ გავიმარჯვებთ”, – განაცხადა ისრაელის პრემიერმა.