ომის დასრულების შემდეგ ისრაელის თავდაცვის ძალები ღაზის სექტორზე კონტროლს შეინარჩუნებენ და საერთაშორისო ძალებს არ გადასცემენ, – ამის შესახებ ისრაელის პრემიერ-მინისტრმა, ბენიამინ ნეთანიაჰუმ განაცხადა.

ღაზის სექტორის მოსაზღვრე ისრაელის ქალაქების მერებთან შეხვედრაზე ისრაელის მთავრობის ხელმძღვანელმა დეტალურად არ ისაუბრა, თუ რამდენ ხანს განახორციელებს ისრაელის არმია კონტროლს არაბულ ანკლავზე.

მანამდე ისრაელის პრემიერ-მინისტრმა „ფოქს ნიუსს“ განუცხადა, რომ ისრაელს არ სურს ღაზის სექტორის ხელახალი ოკუპაცია ან მართვა.

ისრაელის მედია წერს, რომ აშშ-ის ოფიციალურმა პირებმა ბოლო კვირების განმავლობაში წამოჭრეს იმის შესაძლებლობა, რომ საერთაშორისო ძალებს, მეზობელი არაბული მოკავშირეების ჯარებთან ერთად, შესაძლოა არაბული ანკლავის უსაფრთხოების დროებით მართვა შეეძლოთ, მანამ, სანამ ის მოქმედ პალესტინის მთავრობას დაუბრუნდება.