27 აგვისტო, 2022

„ფეისბუქის“ დამფუძნებლის, მარკ ცუკერბერგის თქმით, 2020 წლის არჩევნების დროს ჯო ბაიდენის ვაჟთან – ჰანტერ ბაიდენთან დაკავშირებული სტატიის გაზიარება გამოძიების ფედერალური ბიუროდან (FBI) მიღებული გაფრთხილების შემდეგ შეზღუდა. გამოძიების ფედერალური ბიურო სოციალურ ქსელს რუსული პროპაგანდის სიჭარბეზე აფრთხილებდა.

„ბიბისის“ ცნობით, მარკ ცუკერბერგი განმარტავს, რომ გამოძიების ფედერალურ ბიუროს კონკრეტულად ბაიდენის ისტორიასთან დაკავშირებით გაფრთხილება არ მიუცია, თუმცა „ფეისბუქში“ ჩათვალეს, რომ ეს ისტორიაც ასეთივე კონტექსტის იყო. იმ პერიოდში „ნიუ იორკ პოსტი“ ირწმუნებოდა, რომ ჰანტერ ბაიდენის ლეპტოპიდან გავრცელებული ელექტრონული წერილები ადასტურებდა, რომ იმ დროს ვიცე-პრეზიდენტი ჯო ბაიდენი საკუთარ ვაჟს უკრაინაში ბიზნესის წარმოებაში ეხმარებოდა. „ნიუ იორკ პოსტის“ სტატია არჩევნებამდე რამდენიმე კვირით ადრე გამოიცა. ელექტრონული წერილებიდან ირკვეოდა, რომ ჰანტერ ბაიდენმა მამას წარუდგინა უკრაინის ენერგომაგნატი და შეხვედრა შეათანხმა, თუმცა ჯო ბაიდენის განრიგში ასეთი შეხვედრის გამართვა არ ფიქსირდება. თუმცა, იქიდან გამომდინარე, რომ გაზეთი ექსკლუზიურ მონაცემებზე დაყრდნობით წერდა სტატიას და სხვა სააგენტოებს დედანთან წვდომა არ ჰქონიათ, საზოგადოებაში სკეპტიციზმი გამოიწვია და სოციალურ ქსელებში მასზე ცენზურა გავრცელდა. „ფეისბუქმა“ და „ტვიტერმა“ ამ სტატიების გაზიარება შეზღუდეს.

„აქ წინაისტორია ასეთია, რომ გამოძიების ფედერალური ბიურო მოვიდა ჩვენთან, ჩვენი გუნდის წევრებთან და გვითხრა – „მაინც, რომ იცოდეთ, სიფრთხილე უნდა გამოიჩინოთ“. ვფიქრობთ, 2016 წლის არჩევნებში ძალიან ბევრი რუსული პროპაგანდა იყო. გვაქვს შეტყობინება, რომ ძირითადად ასეთივე გროვა იქნება“, – იხსენებს გამოძიების ფედერალური ბიუროს გაფრთხილებას ცუკერბერგი.

აღსანიშნავია, რომ „ფეისბუქს“ სტატიის გაზიარება სრულად არ შეუზღუდავს, თუმცა ალგორითმის საშუალებით, შეიზღუდა კვირის განმავლობაში გადაზიარების ოდენობა.

ავტორი - სალომე თორაძე