„ბლექ სი არენა“ და ჯგუფი The Killers 15 აგვისტოს გამართულ კონცერტზე მომხდარ ინციდენტთან დაკავშირებით განცხადებას ავრცელებენ.

„გვესმის ჩვენი სტუმრების ემოციების. არტისტის მოქმედება სცენაზე არ არის Black Sea Arena-ს პოზიცია. ვიაზრებთ ჩვენს წილ პასუხისმგებლობას, გულწრფელად ვიხდით ბოდიშს და გიზიარებთ არტისტის პასუხს მომხდართან დაკავშირებით. რუსეთი ოკუპანტია“, – ნათქვამია „ბლექ სი არენას“ განცხადებაში.

რაც შეეხება The Killers-ის პოზიციას, ჯგუფის განცხადებაში აღნიშნულია, რომ არ უნდოდათ ვინმეს გაღიზიანება და ბოდიშს იხდიან.

„ძვირფასო ქართველებო, ჩვენი განზრახვა არასდროს ყოფილა ვინმეს შეურაცხყოფა! დასარტყამ საკრავებზე დასაკვრელად მსმენელის ამოპატიჟება, ჩვენი დიდი ხნის ტრადიციაა და როგორც სცენიდანაც ჩანდა, ერთ-ერთი მსმენელის ჩვენთან ერთად სცენაზე გამოჩენას თავდაპირველად ხალხი დადებითად შეხვდა. ვაცნობიერებთ, რომ კომენტარი იმის შესახებ, რომ The Killers-ის მსმენელები და თაყვანისმცემლები „ძმები და დები“ არიან, შეიძლება, არასწორად იქნას გაგებული. ჩვენ არ გვინდოდა ვინმეს გაღიზიანება და ბოდიშს ვიხდით. ჩვენ თქვენს გვერდით ვართ და ვიმედოვნებთ, რომ მალე ისევ დავბრუნდებით", - ნათქვამია ჯგუფის ოფიციალურ განცხადებაში.

შეგახსენებთ, რომ 15 აგვისტოს „ბლექ სი არენას“ სცენაზე, ჯგუფის The Killers კონცერტზე ჯგუფის წევრებმა სცენაზე რუსი დრამერი აიყვანეს, რასაც კონცერტზე დამსწრე მაყურებლების უკმაყოფილება მოჰყვა.