აშშ-ს ხელისუფლება ევროპაში არსებულ დღევანდელ სიტუაციას განიხილავს როგორც შესაძლებლობას, ევროპამ ერთხელ და სამუდამოდ დააღწიოს თავი რუსულ ენერგორესურსებზე დამოკიდებულებას. ამის შესახებ ამერიკის სახელმწიფო მდივანმა, ენტონი ბლინკენმა კანადის საგარეო უწყების ხელმძღვანელთან, მელანი ჟოლისთან ერთობლივ პრესკონფერენციაზე განაცხადა.

„ვიხილეთ რა რუსეთის აგრესია უკრაინაში და რუსეთის მხრიდან ენერგორესურსების იარაღად გამოყენება, ჩვენ კვირების განმავლობაში ინტენსიურად ვმუშაობდით ევროპელ პარტნიორებთან, ასევე მსოფლიოს ბევრ ქვეყანასთან, რათა მსოფლიო ბაზრებზე ენეგორესურსების საკმარისი მარაგები ყოფილიყო. ჩვენ მნიშვნელოვნად გავზარდეთ წარმოება და ასევე ხელმისაწვდომი გავხადეთ ევროპისთვის თხევადი გაზი, რითაც ხელი შევუწყეთ რეგიონში ნავთობისა და გაზის დანაკლისის აღმოფხვრას, რომელიც რუსეთის მიერ უკრაინაში შეჭრის შემდეგ წარმოიშვა", - თქვა მან.

ბლინკენმა ასევე ახსენა ამერიკის მხრიდან ეროვნული რეზერვებიდან ნავთობის მარაგების გამოყენება, რათა ნავთობის ბაზარზე ფასები დარეგულირებულიყო.

„წინ კიდევ მძიმე სამუშაოების ჩატარება გველის, რომელიც მიმართული იქნება იქითკენ, რომ პარტნიორმა ქვეყნებმა ზამთარი გადალახონ. თავად ევროპა მოთხოვნის შემცირებისთვის მნიშვნელოვან ნაბიჯებს დგამს, ასევე ეძებს გზებს განახლებად ენერგიებზე გადასვლისთვის. საბოლოო ჯამში, ეს ამავდროულად არის წარმოუდგენელი შესაძლებლობა, ევროპამ ერთხელ და სამუდამოდ უარი თქვას რუსულ ენერგორესურსებზე დამოკიდებულებაზე", - დასძინა სახელმწიფო მდივანმა.