ბლოგში "ათონის ფოტოარქივი" დიდი წმინდა იერარქის, XIX საუკუნის ბოლოსა და XX საუკუნის დასაწყისში მოღვაწე დიდი სასწაულთმოქმედი მამის, წმინდა ნექტარიოს ეგინელის მანამდე უცნობი ფოტო გავრცელდა.

ფოტოზე აღბეჭდილია წმინდა ნექტარიოსი, რომელიც იმ დროს ალექსანდრიის საპატრიარქოს პენტაპოლის ეპისკოპოსად მსახურობდა. ფოტოზე ის ალექსანდრიის პატრიარქ სოფრონ IV-ის (1870-1899) გვერდით დგას.

წმინდა ნექტარიოსი 1889 წელს პატრიარქ სოფრონის მიერ ეპისკოპოსის ხარისხში აკურთხეს. თუმცა, წმინდა ნექტარიოსს პატრიარქთან ცილი დასწამეს, თითქოს თავად სურდა პატრიარქობა. შედეგად, ის ჩამოაშორეს დაკავებულ თანამდებობას და 1891 წელს საბერძნეთში დაბრუნდა, სადაც ქადაგებდა და ათენში წამყვანი საღვთისმეტყველო სკოლის დირექტორად მუშაობდა. წმინდა ნექტარიოსმა დააარსა წმინდა სამების დედათა მონასტერი კუნძულ ეგინაზე, სადაც დარჩენილი სიცოცხლე გაატარა და სადაც მისი სასწაულმოქმედი ნაწილები დღემდე განისვენებს.