"ნაპოლი" ჩემპიონთა ლიგას მეოთხედფინალურ ეტაპზე გამოეთიშა. "მილანთან" განმეორებით შეხვედრაში ლუჩანო სპალეტის გუნდმა ფრედ, 1:1 ითამაშა, რაც შემდეგ ეტაპზე გასასვლელად საჭირო არ აღმოჩნდა.

ხვიჩა კვარაცხელიამ 81-ე წუთზე, როდესაც ანგარიში 0:1 იყო, პენალტი ვერ გაიტანა. მატჩის შემდეგ ქართველმა ფეხბურთელმა სოციალურ ქსელში მცირე მიმართვა გაავრცელა და გულშემატკივრებს ბოდიში მოუხადა:

"რთულია, როცა ვხედავ ცრემლებს თქვენს თვალებზე და თქვენთვის ბედნიერება ვერ მომაქვს. ყველანაირად ვეცდები დღევანდელი დღე გამოცდილებად მივიღო. ბოდიში და მადლობა იმ მხარდაჭერისთვის რომელსაც ყოველ წამს ვგრძნობ. მიყვარხართ და დავბრუნდებით უფრო ძლიერები. წინ ბევრი მატჩია, ოცნება გრძელდება!" - წერს კვარაცხელია.

შეგახსენებთ, რომ ეს სადებიუტო სეზონი იყო კვარასთვის ჩემპიონთა ლიგაზე, მის ანგარიშზე 9 მატჩში, 2 გოლი, 4 საგოლე პასი და 1 მოპოვებული პენალტია.