ბორჯღალოსნები მსოფლიო თასის დაწყებამდე ორი კვირით ადრე ედინბურგში, მასპინძელ შოტლანდიასთან ბოლო რეპეტიციას გაივლიან, რის შემდეგაც გეზს საფრანგეთისკენ აიღებენ და ავსტრალიასთან მატჩისთვის ლა როშელში მოემზადებიან.

„მარიფილდზე“ თამაში 26 აგვისტოს, საქართველოს დროით 20:30 საათზე დაიწყება. ბორჯღალოსნების მთავარმა მწვრთნელმა ლევან მაისაშვილმა უკვე დაასახელა 23-კაციანი შემადგენლობა:

ხაზი: 15. დავით ნინიაშვილი, 14. აკაკი ტაბუცაძე, 13. დემე თაფლაძე, 12. მერაბ შარიქაძე (კაპ.), 11. მირიან მოდებაძე, 10. ლუკა მატკავა, 9. ვასილ ლობჟანიძე;

შერკინება: 1. მიხეილ ნარიაშვილი, 2. შალვა მამუკაშვილი, 3. ბექა გიგაშვილი, 4. ლადო ჩაჩანიძე, 5. კოტე მიქაუტაძე, 6. ლუკა ივანიშვილი, 7. მიხეილ გაჩეჩილაძე, 8. თორნიკე ჯალაღონია.

მარქაფა: 16. თენგიზ ზამთარაძე, 17. გურამ გოგიჩაშვილი, 18. გურამ პაპიძე, 19. ლაშა ჯაიანი, 20. სანდრო მამამთავრიშვილი; 21. გელა აფრასიძე, 22. თედო აბჟანდაძე, 23. გიორგი კვესელაძე.

შოტლანდიასთან თამაშს იწყებს და მე-100 კეპს მოიხვეჭს შალვა მამუკაშვილი. დავით კაჭარავას, მერაბ კვირიკაშვილის, სანდრო თოდუას, გიორგი ჩხაიძისა და ლაშა მალაღურაძის შემდეგ, ის გახდება მეექვსე ქართველი ცენტურიონი, რომელმაც 100-იან ნიშნულს უწია.

ბორჯღალოსნები შოტლანდიას მეექვსედ ერკინებიან და ზედიზედ მესამედ ითამაშებენ „მარიფილდზე“, რომელიც სარაგბო მექაა და 67 ათასზე მეტ მაყურებელს იტევს.

მოსამზადებელ ეტაპზე ბორჯღალოსნებმა ორი თამაში გამართეს და ორივე სარეკორდო სხვაობით მოიგეს – რუმინეთთან 56-6 და აშშ-სთან 22-7.

მოცემული მომენტისთვის შოტლანდია 84.01 ქულით მსოფლიო რეიტინგში მე-5 ადგილზეა. საქართველოს 76.23 ქულა აქვს და მე-11 პოზიციაზეა. გამარჯვების შემთხვევაში ბორჯღალოსნები 1,78 ქულას მიიღებენ და მე-10 პოზიციაზე მყოფ უელსს მიუახლოვდებიან, რომელსაც 78.26 ქულა აქვს.