ბოტანიკურ ბაღში 8-9 ოქტომბერს „პურის ფესტივალი“ გაიმართება
![erimedia_ravk/VFCCuuVVg.jpeg](https://cdn.u.media/max/w728/erimedia_ravk/VFCCuuVVg.jpeg)
საქართველოს ეროვნული ბოტანიკური ბაღის ორგანიზებით, 8-9 ოქტომბერს „პურის ფესტივალი“ მესამედ ჩატარდება.
ღონისძიების ფარგლებში წარმოდგენილი იქნება ბოტანიკური ბაღის ქართული მარცვლოვანი კულტურების კოლექცია და საქართველოში მოქმედი პურის მწარმოებელი კომპანიების სარეალიზაციო და სადემონსტრაციო პროდუქცია.
ფესტივალი თეატრალიზებული წარმოდგენით გაიხსნება, სადაც პურის ცხობის ძველი ტრადიციები გაცოცხლდება, მუსიკალურ ფონს კი ქართული ფოლკოლური ანსამბლი შექმნის.
დამთვალიერებელი ორი დღის განმავლობაში, ხორბლის ქართული ენდემური სახეობების გავრცელების შესახებ შემეცნებით ილუსტრაციას იხილავს. ამასთან, ადგილზე ძველი ისტორიული ფოტოების გამოფენა იქნება, რომელზეც პურთან დაკავშირებული საინტერესო ფაქტებია ასახული.
„პურის ფესტივალზე“ დამთვალიერებელს შესაძლებლობა ექნება სხვადასხვა სახეობის ქართული პური დააგემოვნოს და თემატურ გათამაშებებში ჩაერთოს. ფესტივალს მუსიკალურად გიორგი ცხადაძის ბენდი გააფორმებს.