ბრიტანეთის თავდაცვის სამინისტრო ფოტოებს ავრცელებს, რომლებზეც ჩანს, რომ რუსეთის ჯარები ზაპოროჟიეში, ატომური ელექტროსადგურის რეაქტორიდან 60 მეტრშია განთავსებული
25 აგვისტო, 2022
ბრიტანეთის თავდაცვის სამინისტრო სატელიტიდან გადაღებულ ფოტოებს ავრცელებს, რომლებზეც ჩანს, რომ რუსეთის ჯარები ზაპოროჟიეში, ატომური ელექტროსადგურის მეხუთე რეაქტორიდან 60 მეტრშია განთავსებული.
„ვიდრე რუსეთი ატომური ელექტროსადგურის სამხედრო ოკუპაციას ახდენს, რეაქტორების ექსპლუატაციის მთავარ რისკად რეაქტორების გაგრილების სისტემა რჩება“, – ნათქვამია განცხადებაში.
ასევე, როგორც „ბიბისი“ წერს, ზაპოროჟიეს ელექტროსადგურთან დაკავშირებით რუსეთის თავდაცვის მინისტრი სერგეი შოიგუ ტელეფონით ესაუბრა საფრანგეთის თავდაცვის მინისტრ სებასტიან ლეკორნოს. როგორც გავრცელებულ განცხადებაშია ნათქვამი, ორივე მხარემ აღნიშნა, რომ აუცილებელია ელექტროსადგურზე საერთაშორისო ექსპერტების ჩასვლა.
ატომური ენერგიის საერთაშორისო სააგენტოს ხელმძღვანელი იმედოვნებს, რომ ექსპერტები ზაპოროჟიეში ჩასვლას ამ კვირაში მოახერხებენ.
შეგახსენებთ, ზაპოროჟიეს ატომურ ელექტროსადგურს რუსეთი მარტის დასაწყისიდან აკონტროლებს. ატომურ ელექტროსადგურზე მდგომარეობა განსაკუთრებით ბოლო დღეების განმავლობაში დაიძაბა.
ავტორი - თამთა რუხაძე
