ბულგარეთი და პოლონეთი თავიანთ მოქალაქეებს რუსეთის სასწრაფოდ დატოვებისკენ მოუწოდებენ
28 სექტემბერი, 2022
პოლონეთი თავის მოქალაქეებს ურჩევს რუსეთის ფედერაცია დატოვონ. განცხადება ამის შესახებ ქვეყნის საგარეო საქმეთა მინისტრმა გააკეთა. „უსაფრთხოების სიტუაციის გაუარესების, საზღვრების ჩაკეტვისა და სხვა არაპროგნოზირებადი მოვლენების შემთხვევაში“, რუსეთიდან ევაკუაცია შესაძლოა რთული ან თუნდაც შეუძლებელი იყოს საჰაერო მიმოსვლის ნაკლებობის გამო, ნათქვამია განცხადებაში.
პოლონეთის საგარეო საქმეთა სამინისტროს განცხადებით, რუსეთთან პირდაპირი საჰაერო კავშირი ამჟამად არ არსებობს, ქვეყანაში პოლონელი დიპლომატების რაოდენობა შემცირდა, ამის გამო, რუსეთის საზღვრების ჩაკეტვის შემთხვევაში, პოლონეთის მოქალაქეების დახმარების გაწევასთან დაკავშირებით, კერძოდ კი, მათი ევაკუაციის დროს, შესაძლოა პრობლემები წარმოიშვას.
მანამდე, იგივე განცხადება ბულგარეთის საგარეო საქმეთა სამინისტრომაც გააკეთა. ბულგარეთმა თავის მოქალაქეებს „რთული სიტუაციის“ გამო, რუსეთის სასწრაფოდ დატოვება მოსთხოვა. მათ, ვინც ჯერ კიდევ რუსეთში რჩება, ურჩიეს, თავი აარიდონ ხალხმრავალ ადგილებს და განსაკუთრებული სიფრთხილე გამოიჩინონ, ყურადღებით დააკვირდნენ, თუ როგორ განვითარდება მოვლენები და მოსკოვში საელჩოს ან სანქტ-პეტერბურგში გენერალურ საკონსულოს დაუკავშირდნენ.
