საბერძნეთი-ბულგარეთის სისტემათაშორისი გაზსადენი (IGB), რომლის მეშვეობითაც ქვეყანას აზერბაიჯანიდან გაზი მიეწოდება, შაბათს, 1 ოქტომბერს, ოფიციალურად ამოქმედდა. ინფორმაციას ამის შესახებ Deutsche Welle ავრცელებს.

საზეიმო ცერემონია სოფიაში გაიმართა. ევროკომისიის პრეზიდენტმა, ურსულა ფონ დერ ლაიენმა გაზსადენის გახსნას „ბულგარეთისა და სამხრეთ-აღმოსავლეთ ევროპისთვის ახალი ეპოქის დაწყება" უწოდა. "ადრე ბულგარეთი გაზის 80 პროცენტს რუსეთისგან იღებდა, ეს იყო მანამ, სანამ რუსეთი უკრაინის წინააღმდეგ საშინელი ომის და ევროპის წინააღმდეგ კი - ენერგეტიკული ომის დაწყებას გადაწყვეტდა. ეს მილსადენი ბულგარეთისა და ევროპის ენერგოუსაფრთხოებისთვის თამაშის წესებს ცვლის", - დასძინა ურსულა ფონ დერ ლაიენმა.

IGB ბულგარეთის ეროვნული გაზის ქსელის კომპანიას „ბულგარტრანსგაზი“ და საბერძნეთის გაზის ქსელს აკავშირებს. IGB საშუალებით საბერძნეთისა და ბულგარეთის გავლით აზერბაიჯანიდან გაზი ასევე მიეწოდება სერბეთს, ჩრდილოეთ მაკედონიას, რუმინეთს და უნგრეთს. ახალი გაზსადენით ბულგარეთი შეძლებს ყოველწლიურად აზერბაიჯანიდან 1 მილიარდი კუბური მეტრი გაზის მიღებას.