3 სექტემბერი, 2022

სენაკში შუალედური არჩევნებისთვის ემზადებიან. არჩევნები მაჟორიტარული სისტემით, ადგილობრივ მაჟორიტარულ ოლქში სამ საარჩევნო უბანზე ჩატარდება. არჩევნების გამართვა მას შემდეგ გახდა საჭირო, რაც საკრებულოს ერთმა წევრმა „ნაციონალური მოძრაობიდან“ მანდატზე უარი თქვა და საკრებულო დატოვა.

დღევანდელი მოცემულობით არჩევნებში მხოლოდ ორი მაჟორიტარობის კანდიდატი იბრძოლებს „ქართული ოცნებიდან“ ზაზა ყურაშვილი და „პოლიტიკური მოძრაობა სოციალური სამართლიანობისთვის" მამუკა ტუსკაძე.

კანდიდატებმა ამომრჩევლებთან აქტიური შეხვედრები უკვე დაიწყეს. მმართველი გუნდის კანდიდატის განცხადებით, ის კარგად იცნობს სამივე ადმინისტრაციულ ერთეულში არსებულ პრობლემებს და ოქტომბერში ჩატარებული არჩევნები იმ გრძელ ვადიან კრიზისს გადაწყვეტს სენაკის საკრებულოში, რაც ბოლო თვეების განმავლობაში მიმდინარეობდა.

ცესკოს გადაწყვეტილებით სენაკის შუალედური არჩევნები პირველ ოქტომბერს გაიმართება.