ჩეხეთის ხელისუფლებამ რუსეთში მყოფ თავის მოქალაქეებს მოუწოდა, ქვეყანა დატოვონ. ამის შესახებ ჩეხეთის საგარეო უწყების მიერ გავრცელებულ განცხადებაშია ნათქვამი.

განცხადებაში აღნიშნულია, რომ პრაღაში რუსეთში უსაფრთხოების კუთხით გაუარესებული მდგომარეობის გამო შეშფოთებული არიან და მოქალაქეებს მოუწოდებენ, რაც შეიძლება მალე დატოვონ რუსეთის ტერიტორია.

ასევე, ჩეხეთის საგარეო უწყება საკუთარ მოქალაქეებს ურჩევს, რუსეთში გამგზავრებისგან თავი შეიკავონ.

„რუსეთის მხრიდან უკრაინაში სამხედრო შეჭრის გამო, არსებობს უსაფრთხოების კუთხით სიტუაციის გაუარესების საფრთხე, უპირველეს ყოვლისა კი ეს ეხება ევროკავშირისა და ნატო-ს წევრი ქვეყნების მოქალაქეებისთვის“, – ნათქვამია განცხადებაში.

ჩეხეთი ასევე აფრთხილებს მოქალაქეებს, რომ მოსკოვში ჩეხეთის საელჩო შესაძლოა, მუშაობის შეზღუდულ რეჟიმზე გადავიდეს.

მანამდე, რუსეთის დატოვებისკენ მოქალაქეებს მოუწოდა აშშ-მა, პოლონეთმა, რუმინეთმა და ბულგარეთმა.