2024 წლის 16 მაისს საქართველოსა და ჩეხეთის იუსტიციის მინისტრებმა პრაღაში რიგით მეორე ქართულ-ჩეხური სამართლებრივი ფორუმი გახსნეს.

ღონისძიებასთან დაკავშირებით ჩეხური მედიისთვის მიცემულ ინტერვიუში ჩეხეთის იუსტიციის მინისტრმა პაველ ბლაჟეკმა აღნიშნა, რომ თავის ქართველ კოლეგა რატი ბრეგაძესთან ჰქონდა საუბარი უცხოური გავლენის გამჭვირვალობის შესახებ საქართველოს კანონის თაობაზე და არსებული გეოპოლიტიკური სიტუაციის გათვალისწინებით, საქართველოს მთავრობის პოზიცია მისთვის გასაგებია. ბლაჟეკის თქმით, არასწორია, საქართველოს ხელისუფლებას "პრორუსული" ეწოდოს.

აღნიშნული კომენტარის გამო, ბლაჟეკი სოციალურ ქსელ X-ში ჩეხმა ევროპარლამენტარმა, მარკეტა გრეგოროვამ გააკრიტიკა. გრეგოროვა ჩეხეთის იუსტიციის მინისტრს წითელი ბარათითაც დაემუქრა, თუ ის „პრორუსი აგენტების“ დაცვას არ შეწყვეტდა.

ბლაჟეკმა აღნიშნულ განცხადებას გრეგოროვასთვის დამახასიათებელი ზედაპირული ტყუილი უწოდა და მოიყვანა ამონარიდები მედიისთვის მიცემული ინტერვიუდან:

„ფუნდამენტური შეცდომაა, როცა მხოლოდ ჩვენი გადმოსახედიდან განვიხილავთ განსხვავებული ისტორიისა და გეოგრაფიული რეალობის მქონე უცხო სახელმწიფოს. ქართველებს ჩვენგან განსხვავებულ გარემოში უწევთ გადაწყვეტილებების მიღება. ჩვენ უნდა ვეცადოთ, ვიყოთ ემპათიურები მათი სიტუაციის მიმართ და მხოლოდ ამის შემდეგ შეგვეძლება მათი შეფასება“.

…

„მან [საქართველოს იუსტიციის მინისტრმა] ამიხსნა, რამდენად რთულია მათი მდგომარეობა რუსეთთან მიმართებით, იმის გათვალისწინებით, რომ საქართველოს ტერიტორიის ნაწილი რუსების მიერ არის ოკუპირებული. არ მინდა საქართველოს დღევანდელ ხელისუფლებას პრორუსული იარლიყი მიენიჭოს. დასავლეთი არასოდეს გაგზავნის იქ ჯარს. ისინი შეჩვეულები არიან რუსული არმიის პირისპირ ყოველთვის მარტო ყოფნას. მათ შეიძლება ჩვენი შეხედულებებისგან განსხვავებულად იმოქმედონ, მაგრამ ისინი მარტონი არიან“, - ციტირებს საკუთარ ინტერვიუდან ამონარიდს სოციალურ ქსელში ბლაჟეკი.