ჩეხეთის საგარეო საქმეთა მინისტრი - ვიზების სრულად აკრძალვაზე თანხმობა არ არსებობს, ვფიქრობ, ახლოს ვართ იმ გზის მოძებნასთან, როგორ გავუგზავნოთ ძლიერი სიგნალი მოსკოვს
31 აგვისტო, 2022
ჩეხეთის საგარეო საქმეთა მინისტრის, იან ლიპავსკის განცხადებით, რუსეთის მოქალაქეებისთვის ვიზების აკრძალვის საკითხზე ევროკავშირის წევრმა ქვეყნებმა საერთო ევროპული პოზიცია უნდა მოძებნონ.
მისივე თქმით, არ არსებობს თანხმობა ტურისტული ვიზების სრულად აკრძალვაზე. როგორც იან ლიპავსკი ამბობს, ეძებენ გზას, თუ როგორ უნდა შეამციროთ ვიზების გაცემის რიცხვი.
„მესმის, რომ საერთო ევროპული პოზიცია უნდა მოვძებნოთ, რადგან არ არსებობს თანხმობა ტურისტული ვიზების სრულად აკრძალვაზე. ვფიქრობ, ძალიან ახლოს ვართ იმ გზის მოძებნასთან, როგორ გავუგზავნოთ ძლიერი სიგნალი მოსკოვსა და რუსულ ელიტას, რადგან ნებისმიერ მოქალაქეს ევროპაში ტურისტად მოგზაურობა არ შეუძლია. ეს არის რუსული ელიტა და მათ უნდა გაიგონ. და უნდა გავიგოთ ჩრდილოეთ ბალტიის სახელმწიფოების პრაქტიკული პრობლემა, რომელთა საზღვრები გადატვირთულია მოძრაობით. ეს მათთვის უსაფრთხოების საკითხია და დარწმუნებული ვარ, გამოსავალს ვიპოვით.
მხოლოდ სავიზო მოსაკრებლის გაზრდა საკმარისი არ არის, კარგი იდეაა, მაგრამ არასაკმარისია. სავიზო შეთანხმება დაფუძნებულია იმაზე, რომ ჩვენ გვექნება კარგი ურთიერთობა. ჩვენ გვსურს კარგი ურთიერთობა, მაგრამ ეს არ სურს რუსეთს. როგორც ადრე აღვნიშნე, ჩვენ ვეძებთ გზას, როგორ შევამციროთ ვიზების გაცემის რიცხვი. ომია, შეხედეთ, რა ხდება უკრაინაში, შეხედეთ, რას შვება რუსეთი უკრაინაში და ამავე დროს, რუსი ტურისტები ჩამოდიან ჩვენს კურორტებზე „სპას“ მისაღებად, სიამოვნებისთვის. არა, ეს არ არის ის, რაც ჩვენ უნდა დავუშვათ“, – განაცხადა იან ლიპავსკიმ.
