ჩრდილოატლანტიკური საბჭო - ბალტიის ზღვაში „ჩრდილოეთის ნაკადის“ მილსადენების დაზიანების შესახებ შეგროვებული ინფორმაცია დივერსიაზე მიუთითებს
29 სექტემბერი, 2022
ჩრდილოატლანტიკურ საბჭოში განაცხადეს, რომ ბალტიის ზღვაში „ჩრდილოეთის ნაკადის“ მილსადენების დაზიანების შესახებ შეგროვებული ინფორმაცია დივერსიაზე მიუთითებს.
ჩრდილოატლანტიკურ საბჭოში ხაზგასმით აღნიშნეს, რომ მილსადენების დაზიანება ღრმა შეშფოთებას იწვევს.
„ეს გაჟონვები რისკებს იწვევს ტრანსპორტირებისთვის და გარემოს არსებით ზიანს აყენებს. ჩვენ მხარს ვუჭერთ გამოძიებას, რომელიც დაზიანების წარმოშობის დასადგენად მიმდინარეობს. მოკავშირეების კრიტიკულ ინფრასტრუქტურაზე ნებისმიერი მიზანმიმართული თავდასხმა ერთიან და მტკიცე პასუხს მიიღებს“, - ნათქვამია განცხადებაში.
28 სექტემბერს, ნატოს გენერალურმა მდივანმა, იენს სტოლტენბერგმა განაცხადა, რომ „ჩრდილოეთის ნაკადის“ გაზსადენზე აღმოჩენილი გაჟონვა დივერსიის შედეგია.
„ჩვენს ძვირფას მოკავშირე, დანიის თავდაცვის მინისტრ, მორტენ ბოდსკოვთან განვიხილეთ "ჩრდილოეთის ნაკადის“ გაზსადენებზე დივერსია. ასევე განვიხილეთ ნატოს ქვეყნებში კრიტიკული ინფრასტრუქტურის დაცვის საკითხი“, - აღნიშნა ნატოს გენერალურმა მდივანმა.
„ჩრდილოეთის ნაკადი 1“-ის გაზსადენმა, რომელიც რუსეთს გერმანიასთან ბალტიის ზღვის გავლით აკავშირებს, ორ წერტილში გაჟონა. მსგავსი გაჟონვა „ჩრდილოეთის ნაკადი 2“-ის გაზსადენზე მოხდა.
