ჩრდილოეთ ოსეთში რუსეთის სხვა რეგიონებიდან ავტომობილებით შესვლა შეიზღუდა
28 სექტემბერი, 2022
ჩრდილოეთ ოსეთში რუსეთის სხვა რეგიონებიდან ავტომობილებით შესვლა შეიზღუდა. ამის შესახებ ინფორმაციას “რია ნოვოსტი” რეგიონის მთავრობის პრესსამსახურზე დაყრდნობით ავრცელებს.
ადგილობრივი მთავრობის პრესსამსახურის ცნობით, ჩრდილოეთ ოსეთის ლიდერმა, სერგეი მენიაილომ გაზრდილი მზადყოფნის რეჟიმი გამოაცხადა.
აღინიშნება, რომ ჩრდილოეთ ოსეთში რუსეთის სხვა რეგიონებიდან ავტომობილით შესვლის შეზღუდვა არ შეეხება მათ, ვინც რეგიონის ტერიტორიაზე მდებარე სანატორიუმებში, პანსიონატებსა და ტურისტულ ბაზებზე მიემართება და შესაბამისი საბუთები გააჩნია.
ასევე აღნიშნულია, რომ მუნიციპალურ ადმინისტრაციებს საგანგებო სიტუაციების პრევენციისთვის ოპერატიული შტაბების შექმნის რეკომენდაცია მიეცათ. რეკომენდაცია ასევე ითვალისწინებს, ხალხისა და სატრანსპორტო საშუალებების თავმოყრის ადგილებში კვების, გათბობის, სამედიცინო მომსახურებისა და დასვენების პუნქტების შექმნას. საქართველოსთან საზღვარზე ასევე რეკომენდებულია ადამიანებისთვის “სათანადო სანიტარიულ-ჰიგიენური მდგომარეობის” უზრუნველყოფა, - ნათქვამია ინფორმაციაში.
