დეკანოიძე: სააკაშვილის მდგომარეობა არ უმჯობესდება, ამაზე კი პასუხისმგებლობა მმართველ გუნდს ეკისრება
"ქართულ ოცნების" წარმომადგენლებს არაერთხელ შევთავაზე საჯაროდ, რომ თუ ექს-პრეზიდენტ მიხეილ სააკაშვილის ცუდად ყოფნაში ეჭვი ეპარებათ, კლინიკაში პირადად მოინახულონ და მისი ჯანმრთელობის მდგომარეობით დაინტერესდნენ, განაცხადა საპარლამენტო ფრაქცია „ერთიანი ნაციონალური მოძრაობის“ თავმჯდომარე ხატია დეკანოიძემ.
როგორც დეკანოიძემ ჟურნალისტებს განუცხადა, მიხეილ სააკაშვილის მდგომარეობა ძალიან მძიმეა.
"რაც არ უნდა ზიზღით განმსჭვალული ენით ისაუბროს მმართველმა გუნდმა, ფაქტი არის ერთი - მიხეილ სააკაშვილის ჯანმრთელობის მდგომარეობა არის არა პროგრესირებადი, არამედ რეგრესია, ადამიანი არის ცუდად. ჩემს დაკვირვებას მოგახსენებთ ყოველგვარი დრამატულობის გარეშე, რომ წონის კლება არის ძალიან მძიმე. როდესაც მისი მდგომარეობა არ უმჯობესდება, ამაზე პასუხისმგებლობა პირველ რიგში, მმართველ გუნდს ეკისრება. შესაბამისად, ჩვენ უნდა შევხედოთ ამას არა პოლიტიკურ კონტექსტში, არამედ ჰუმანიტარულ და ადამიანის სიცოცხლის გადარჩენის", - განაცხადა დეკანოიძემ.