ირანის, თურქეთისა და რუსეთის საგარეო საქმეთა მინისტრები დღეს თეირანში აზერბაიჯანელ და სომეხ კოლეგებს შეხვდებიან და აზერბაიჯანსა და სომხეთს შორის სამშვიდობო შეთანხმების მიღწევის საკითხს განიხილავენ, - ინფორმაციას Reuters-ი ირანულ და რუსულ მედიაზე დაყრდნობით ავრცელებს.

„ქვეყნებს რეგიონულ საკითხებზე საუბარი არარეგიონული და დასავლური ქვეყნების ჩარევის გარეშე სურთ", - ამის შესახებ საინფორმაციო სააგენტო IRNA ირანის საგარეო საქმეთა სამინისტროს განცხადებაზე დაყრდნობით იუწყება.

Reuters-ი წერს, რომ ეს არის აშკარა მინიშნება შეერთებულ შტატებსა და ევროკავშირზე, რომელთა ჩართულობამ სომხეთსა და აზერბაიჯანს შორის სამშვიდობო შეთანხმების მიღწევაში განსაკუთრებით გააღიზიანა მოსკოვი.

სააგენტოს სტატიაში აღნიშნულია, რომ რუსეთი თავს აზერბაიჯანსა და სომხეთს შორის უსაფრთხოების გარანტად მიიჩნევს, მაგრამ უკრაინაში დაწყებულმა ომმა მისი გავლენის შესუსტება გამოიწვია.

Reuters-ი ინფორმაციით, სამხრეთ კავკასიის ე.წ. 3+3 პლატფორმა, რომლის ფორმატშიც მოლაპარაკებები პირველად 2021 წელს გამართა, საქართველოსაც უნდა მოიცავდეს, მაგრამ საქართველომ განაცხადა, რომ თეირანში არ ჩავა.