რუსეთის თავდაცვის სამინისტროს კადრების სამმართველოს უფროსს მექრთამეობაში დასდეს ბრალი, მისი სახლიდან 100 მილიონი რუსული რუბლი (ერთი მილიონი დოლარი) ამოიღეს.

როგორც „ბიბისის“ რუსულენოვანი სამსახური იუწყება, რუსეთის საგამოძიებო კომიტეტმა გაავრცელა ინფორმაცია, რომ რუსეთის თავდაცვის სამინისტროს კადრების მთავარი სამმართველოს უფროსს ბრალი განსაკუთრებით დიდი ოდენობით ქრთამის აღებისთვის წაუყენეს.

როგორც ოფიციალურ განცხადებაშია ნათქვამი, იური კუზნეცოვი 2021-2023 წლებში რუსეთის გენშტაბის მერვე სამმართველოს უფროსი იყო, როდესაც, გარკვეული ქმედებების სანაცვლოდ, კომერციული სტრუქტურების წარმომადგენლებისგან ქრთამი აიღო.

კონკრეტულად რა ქმედებებზეა საუბარი, განცხადებაში არაფერია ნათქვამი.

საგამოძიებო კომიტეტის ინფორმაციით, კუზნეცოვის სახლის ჩხრეკისას ამოღებულია დიდი ოდენობით ნაღდი ფული, 100 მილიონი რუბლზე მეტი (ერთი მილიონი დოლარი) და ასევე ოქროს მონეტები, საკოლექციო საათები და ფუფუნების საგნები.

სასამართლომ უკვე მიიღო გადაწყვეტილება კუზნეცოვის წინასწარი დაკავების იზოლატორში გადაყვანის შესახებ.

რუსეთის თავდაცვის სამინისტროს მაღალჩინოსნის დაკავება ხმაურიანი სკანდალის ფონზე მოხდა, რომელშიც თავდაცვის მინისტრის მოადგილე ტიმურ ივანოვი ფიგურირებს. მას ასევე მექრთამეობაში ედება ბრალი.

12 მაისს ვლადიმერ პუტინმა რუსეთის თავდაცვის მინისტრი სერგეი შოიგუ თანამდებობიდან გაათავისუფლა.