დიმიტრი პესკოვი აცხადებს, რომ პოლონეთის მიერ ბელარუსის საზღვართან ტანკების განლაგება უფრო გაამწვავებს დაძაბულობას
რუსეთის პრეზიდენტის პრესმდივანი დიმიტრი პესკოვი პოლონეთის მიერ ბელარუსის საზღვართან ტანკების განლაგებას ეხმაურება.
პესკოვი აცხადებს, რომ ტანკების ბელარუსის საზღვართან განლაგება დაძაბულობას უფრო გაამწვავებს, მაგრამ მოსკოვის მოკავშირეები მინსკში უსაფრთხოების უზრუნველსაყოფად ყველაფერს გააკეთებენ.
„ეს კიდევ ერთი ნაბიჯია დაძაბულობის გაზრდისკენ, მაგრამ, ჩვენმა ბელარუსმა მეგობრებმა იციან, რა უნდა გააკეთონ. ზოგადად, ისინი ყველაფერს აკეთებენ, რაც ამ სიტუაციაში საჭიროა უსაფრთხოების უზრუნველსაყოფად“, – თქვა პესკოვმა.
პოლონეთის მთავრობამ განაცხადა, რომ ისინი ბელარუსის საზღვართან სატანკო ბატალიონს განათავსებენ. როგორც პოლონეთის თავდაცვის მინისტრმა, მარიუშ ბლაშაკმა განაცხადა, რუსეთმა ომი დაიწყო, რადგან იმპერიის აღდგენა სურს, სწორედ ამიტომ, თავდასხმის თავიდან ასაცილებლად, პოლონეთმა არმია გააძლიერა.
