აშშ-ის ყოფილი პრეზიდენტი დონალდ ტრამპი ფულტონის ოლქის ციხეში გამოცხადების შემდეგ დააკავეს და გირაოს სანაცვლოდ გაათავისუფლეს. ინფორმაციას „სიენენი“ ავრცელებს. დონალდ ტრამპმა ფულტონის ოლქის ციხე უკვე დატოვა.

ციხეში პროცედურები დაახლოებით 20 წუთის განმავლობაში გაგრძელდა. დონალდ ტრამპს თითის ანაბეჭდები აუღეს და ფოტო გადაუღეს. შეთანხმების საფუძველზე, აშშ-ის ყოფილი პრეზიდენტი 200 000 აშშ დოლარის ოდენობის გირაოს სანაცვლოდ გაათავისუფლეს. ასევე, მას ეკრძალება სოციალური მედიის გამოყენება, რათა საქმეში მის 18 თანაბრალდებულზე, ასევე ნებისმიერ მოწმეზე ან 30 დაუსაბუთებელ თანამონაწილეზე ზეწოლა ვერ განახორციელოს.

გათავისუფლების შემდეგ ატლანტის აეროპორტში ტრამპმა მედიასთან მცირე კომენტარი გააკეთა.

როგორც აშშ-ის ყოფილი პრეზიდენტი აცხადებს, მას არაფერი დაუშავებია და ეს ამერიკისთვის სამწუხარო დღეა.

„ძალიან სამწუხარო დღეა ამერიკისთვის, რომელიც აღარ უნდა განმეორდეს… მე არაფერი დამიშავებია“, – ამბობს ტრამპი. აშშ-ის ყოფილი პრეზიდენტის განცხადებით, მას სჯერა, რომ არჩევნები გაყალბებული იყო.

„ჩვენ გვაქვს ყველა უფლება, გავაპროტესტოთ არჩევნები, რომელიც არაკეთილსინდისიერად მიგვაჩნია“, – თქვა ტრამპმა.

ყოფილ პრეზიდენტს სისხლის სამართლის ბრალდება წელს უკვე მეოთხედ წაუყენეს.