აშშ-ის ყოფილი პრეზიდენტი დონალდ ტრამპი ამბობს, რომ ბაიდენის ადმინისტრაციის გადაწყვეტილების შედეგად, „ჰამასის“ ისრაელზე თავდასხმას ამერიკელი გადასახადის გადამხდელები აფინანსებენ. ამის შესახებ ტრამპმა Truth Social-ზე, სოციალურ მედიაპლატფორმაზე დაწერა.

მედიაში გავრცელებული ცნობით, ბაიდენის ადმინისტრაციამ 2021 წელს პალესტინას დახმარება აღუდგინა და იმ დროისთვის 235 მილიონი აშშ დოლარი გამოუყო. მედიის ცნობით, მაშინ კრიტიკოსებმა ბაიდენის ადმინისტრაცია გააფრთხილეს, რომ დახმარების განახლებამ შესაძლოა "ჰამასის" ოპერაციები გააძლიეროს. მედიის ცნობით, ტრამპი ბაიდენის ადმინისტრაციის სწორედ ამ გადაწყვეტილებას გამოეხმაურა. ბაიდენმა მილიარდობით დოლარი გამოუყო ასევე ისრაელს.

„ჰამასის ეს თავდასხმები სამარცხვინოა და ისრაელს სრული უფლება აქვს თავი დიდი ძალით დაიცვას. სამწუხაროდ, ბაიდენის ადმინისტრაციის ხელით, ამერიკელმა გადასახადის გადამხდელებმა, ხელი შეუწყვეს ამ თავდასხმების დაფინანსებას. "აბრაამის შეთანხმების" საშუალებით ჩვენ ახლო აღმოსავლეთს დიდი მშვიდობა მოვუტანეთ, ხოლო ბაიდენის ადმინისტრაციამ ის ერთი ხელის მოსმით გაანულა და ყველაფერი თავიდან დაიწყო", - წერს დონალდ ტრამპი.