ორშაბათს ფულტონის ოლქის პროკურორს, ფანი უილისს ტრამპის ადვოკატები შეხვდნენ. ყოფილი პრეზიდენტს გირაოს სახით, სასამართლო პროცესამდე თავისუფლების სანაცვლოდ, 200,000 აშშ დოლარი შეეფარდა. ამასთან ყოფილ პრეზიდენტს ეკრძალება სოციალური მედიის გამოყენება და ადვოკატების გარეშე აღნიშნულ საქმეში 18 თანაბრალდებულთან, ნებისმიერ მოწმესთან ან თანამონაწილესთან კომუნიკაცია, ასევე, ნებისმიერი ფორმით მათზე ზეწოლა.

მანამდე ყოფილმა პრეზიდენტმა თავის Truth Social პლატფორმაზე დაწერა, რომ მას ხუთშაბათს დააპატიმრებენ.

„ხუთშაბათს მივდივარ ატლანტაში, ჯორჯიის შტატში, იმისთვის, რომ ოლქის პროკურორმა, რადიკალმა და მემარცხენე ფანი უილისმა დამიჭიროს“, - დაწერა ტრამპმა.

აშშ-ის ყოფილ პრეზიდენტს ჯორჯიის შტატში 2020 წლის საპრეზიდენტო არჩევნების შედეგების შეცვლის მცდელობა ედება ბრალად.

ფულტონის ოლქის პროკურორმა, ფანი უილისმა, რომელიც ტრამპის წინააღმდეგ საქმეს უძღვება, სასამართლოს მიმართა, რომ ყოფილ პრეზიდენტს ოფიციალური ბრალდება 5 სექტემბერს წაუყენონ, ხოლო, სასამართლო პროცესი მომავალი წლის მარტში დაიწყოს.