აშშ-ის რიგით 45-ე პრეზიდენტს, დონალდ ტრამპს, ჯორჯიის შტატის ნაფიც მსაჯულთა დიდმა კოლეგიამ ბრალი წაუყენა. საქმე 2020 წლის არჩევნების შედეგების შეცვლის მცდელობას ეხება. 98-გვერდიან საბრალდებო დასკვნაში აღნიშნულია, რომ დონალდ ტრამპის გარდა, ბრალი კიდევ 19 პირს წარედგინა.

საბრალდებო დასკვნაში, რომელიც 41 პუნქტისგან შედგება, დეტალურად არის აღწერილი, თუ რაში ედება ბრალი აშშ-ის ყოფილ პრეზიდენტს. მათ შორისაა: ჯორჯიის შტატის რეკეტული აქტის დარღვევა; საჯარო მოხელის მიერ ფიცის დარღვევის მოთხოვნა; საჯარო მოხელედ თავის წარმოჩენა; დოკუმენტების გაყალბება; ყალბი განცხადებები, ნაწერები და ყალბი დოკუმენტების წარდგენა და სხვა.

საბრალდებო დასკვნა ბრალდებულებს „კრიმინალურ ორგანიზაციად“ მოიხსენიებს და მათ ბრალს სდებს სხვა დანაშაულებშიც, მათ შორის მოწმეებზე ზემოქმედების, კომპიუტერის ხელყოფის, ქურდობისა და ცრუ ჩვენების მიცემაში.

შეგახსენებთ, რომ დონალდ ტრამპისთვის ეს უკვე მეოთხე საბრალდებო აქტია.