საფრანგეთის პრეზიდენტთან, ემანუელ მაკრონთან შეხვედრისას ისრაელის პრემიერ-მინისტრმა, ბენიამინ ნეთანიაჰუმ „ჰამასის“ თავდასხმა ჰოლოკოსტს შეადარა.

ისრაელის მთავრობის ხელმძღვანელის თქმით, „ჰამასის“ ბარბაროსობა ებრაელებს, ახლო აღმოსავლეთს, ევროპას და მთელ მსოფლიოს ემუქრება. ნეთანიაჰუმ ღაზას „ისლამური სახელმწიფოს ანკლავი“ უწოდა.

„„ჰამასი“ პასუხისმგებელია მშვიდობიანი მოსახლეობის მსხვერპლზე, მაგრამ ჩვენ ყველაფერს გავაკეთებთ, რომ ამ ომში რაც შეიძლება სწრაფად ვიბრძოლოთ. ეს შეიძლება ხანგრძლივი ომი იყოს. როდესაც ეს დასრულდება, ისრაელის ხალხი თავის თემებს აღადგენს და ღაზის ხალხი აღარ იცხოვრებს „ჰამასის“ ტირანიის ქვეშ. ერთი პირობაა, „ჰამასი“ უნდა განადგურდეს. გამოცდა დასავლეთისთვის და ცივილიზაციისთვის არის „ჰამასი“. თუ „ჰამასი“ გამარჯვებული გამოვა, ყველანი წავაგებთ. ევროპას საფრთხე დაემუქრება. თუ „ჰეზბოლა“ შეცდომას დაუშვებს და ამ ომს შეუერთდება, ინანებს“, – განაცხადა ისრაელის პრემიერ-მინისტრმა.

თავის მხრივ, საფრანგეთის პრეზიდენტი გამოვიდა ინიციატივით, რომ ე.წ. ისლამურ სახელმწიფოსთან მებრძოლი საერთაშორისო კოალიცია „ჰამასის“ წინააღმდეგაც იყოს გამოყენებული.

„„ჰამასი“ არის ტერორისტული დაჯგუფება, რომლის მიზანია ისრაელის სახელმწიფოს განადგურება. ეს ასევე ეხება ისლამურ სახელმწიფოს, ალ-ქაიდას და მათ, ვინც მათ ქმედებებსა და განზრახვებთან ასოცირდება. თქვენთან ერთად მთლიანად დემოკრატიის და საფრანგეთის პრიორიტეტია ამ ტერორისტული ჯგუფების დამარცხება. მე ვთავაზობ ჩვენს საერთაშორისო პარტნიორებს: ჩვენ შეგვიძლია რეგიონული და საერთაშორისო კოალიცია შევქმნათ იმ ტერორისტული ჯგუფების წინააღმდეგ საბრძოლველად, რომლებიც ყველას გვემუქრებიან. ბრძოლა უნდა იყოს დაუნდობელი, მაგრამ არა წესების გარეშე, რადგან ჩვენ ვართ დემოკრატიები, რომლებიც ვიბრძვით ტერორისტების წინააღმდეგ, დემოკრატიები, რომლებიც პატივს სცემენ ომის კანონებს და უზრუნველყოფენ ჰუმანიტარულ ხელმისაწვდომობას“, – აღნიშნა საფრანგეთის პრეზიდენტმა.