17 აგვისტო, 2022

ცხელი ზაფხულის ფონზე ევროპაში ბუნებრივ აირზე მოთხოვნა იზრდება, რაც ენერგოკრიზისს კიდევ უფრო ამძაფრებს და რეცესიის საფრთხეს ზრდის.

ერთი დღის წინ Dutch TTF-ის ბუნებრივი აირის ფიუჩერსების ფასმა 1 მგვტ.სთ-ზე 234.5 ევროს მიაღწია, რაც რეკორდული მაჩვენებელია. ამჟამად ფასი 227 ევროზე ოდნავ მეტია, მაშინ, როდესაც წინა წელს ამ დროს ფასი 28.8 ევრო იყო.

ფასის ბოლოდროინდელი ზრდა, ერთი მხრივ, რუსული გიგანტის Gazprom PJSC-ის პროგნოზთანაა დაკავშირებული, რომლის თანახმადაც, ევროპაში გაზის ფასი ახლანდელთან შედარებით 60%-ით გაიზრდება ზამთრისთვის და 347 ევროსაც კი მიაღწევს.

ამას თან დაერთო მშრალი და ცხელი ამინდი, რამაც მდინარეებში წყლის დონე შეამცირა და შეაფერხა ენერგომატარებლების გადაზიდვა. წყლის დონის კლება ჰიდროელექტროსადგურების გამომუშავების შემცირებაც მოჰყვა თან და კონტინენტზე ელექტროენერგიის ფასების რეკორდულად გაზარდა.

ენერგიის ფასები ევროპაში მკვეთრად მას შემდეგ იზრდება, რაც რუსეთმა Nord Stream-მილსადენით მიწოდების შემცირება დაიწყო და ცდილობს, რეგიონის ეკონომიკა ამ იარაღით დააზარალოს.

ევროპა ჯერ კიდევ დიდწილადაა დამოკიდებული რუსულ ენერგორესურსებზე და მიუხედავად გათხევადებული ბუნებრივი აირის (LNG) იმპორტის რეკორდულად ზრდისა აშშ-დან და OPEC-ის მიერ წარმოების მცირედით გაზრდისა, მოკლევადიან პერიოდში სრული ჩანაცვლება, ფაქტობრივად, შეუძლებელია. ენერგიის მოხმარების ხარჯების ზრდა ქვეყნებს აიძულებს ზამთარში ინდუსტრიებისთვის ელექტროენერგიის და გაზის მიწოდების რაციონირებაზე იფიქრონ.

მარაგების შესავსებად სწრაფვა გაზის ფასებს არა მარტო ევროპაში, არამედ აზიაშიც ზრდის. კონტინენრზე LNG-ის საორიენტაციო ფასმა სამშაბატს 60 დოლარს გადააჭარბა, რაც მარტის დასაწყისის შემდეგ ყველაზე მაღალი ნიშნულია.

ავტორი: კახა ჩაკვეტაძე